開模型鋪的辛酸血淚

以下是一位朋友, Winson兄開模型鋪的親身經歷
當中的辛酸血淚實不足為外人道
小弟感同身受. 請各位細想一下他的努力跟他的回報成正比嗎?

"我都6月份執左,邊間就唔講啦~知道就知道~
我都係近期執左先出返POST,免得出張成品相都有代工廣告之嫌~


根本唔洗咩經濟唔經濟~
可以同你講笨大野完全無錢搵的
你地普通玩家包括我開之前以為食水好深,好賣炒貴幾十就覺得鋪頭奸商
環頭環尾有的鋪差廿三十就話人貴,淨睇唔幫襯


但可以同你講,二百蚊樓下笨大模型計,旺角姑住一樓個價減八至十蚊,就係一般鋪頭入貨價~
當然我相信阿姑因為食大量,所以唔同批價~
利潤少就故之然,最可怕係就入一打咁計,你一定要全部賣晒先有錢落袋,有一隻賣唔出都係蝕!


早三幾年都話國內野平,家下人仔升到喊,日元貴到死~
o的客明白o的野貴得有道理,但公司出糧唔會多左
只會買少左,本來薄利就靠多銷,咁唔多銷可唔可以加價?
o的野本身來貨都加到暈,邊到鋪仔加丫,加左等於無人買


咁補品,油呀,壽屋呀,軍事野,民用比例呀,首辦之類呢?
補品絕對好睇唔好食,其實真係入一次貨可以賣好耐,
仲要有時好靠風潮,呢期有人吹好用,可以改邊隻邊隻就即刻斷市,你下個月返就無人理
油還算可以,但唔好以為消耗品一定好賣~你覺得十個買模型o既人有無半個人係噴油丫?
其他模型計都一樣,十盒笨大高達未必一盒其他牌子


而近年又鬼咁興開倉,大家開倉買得開心之餘,個市價亦拉低晒,
而且因為大家會好記得個價係呢個位,會好深刻咁認為[呢隻野唔值錢]
要等好耐好耐先肯接受高返o既價格
我有一次好痛o既經驗,新安洲電鍍版,入貨我唔記得實際幾多~
但我好記得瑞記派貨之後o個個星期四係海運搞展銷,平過批一舊水!


你再睇下情報區同吹水室有幾多個POST同RE話家下o的野太貴等佢跌先入
幾多個師兄話,反正一個星期要出旺角行個圈先安樂.反正出面平十蚊不如唔好咁急玩,
什至話出面多幾盒揀,情願出面貴少少都好過環頭環尾鋪有時盒殘~
盒殘係專屈我地食架~


呢o的好正常,我一執左之後做返消費者我一樣用返呢個模式行動
人之常情
所以o的鋪執亦係必然結果
直到個餅分得平均,自然會定~到好做時又會多人做,然後又一場執笠潮~
係咁架喎~"

原文出處: http://www.hkml.net/forum.htm

~~~~~~~感想~~~~~~~~

今次忽然想發下嗡風, 希望大家唔好介意
本人回港數年, 一直有留意香港模型製作, 發覺一個現像. 便是有很多隱世高手, 他們技術高超, 而且與同好間樂於交流溝通, 交換心得, 擴闊大家的進步空間. 反觀模型上色服務則是兩碼子的事! 同業間勾心鬥角, 惡性競爭. 還記得本人當初開業時, 曾向多間模型商鋪打招呼, 希望交換心得, 借以維繫一個友好關係. 可恨的是竟沒有一個理會或回覆我!

回顧從前在外國, Hobby Japan與同業關係友好, 互相尊重, 相互交流心得與意見. 一直维持一健康且和睦的競爭環境. 然而香港模型業則你爭我奪, 不僅同業間欠缺溝通, 而且各掃門前雪, 唯恐飯碗給搶走了! 最可怕的是大家毫不尊重對方! 總之他人做的必定不及自己好, 互數對方不是, 絲毫不尊重他人的創作意念. 最近有客人告訴我, 我的某產品被某某商户盗用了設計, 最可惡的是此人竟留聯絡資料自稱是Only One Hobby的Ken!!! 另一案例亦是由客人提供, 話說此客人在未光顧本公司前, 有請某商鋪代上色一MG模型, 價約二千. 怎料成品竟全隻消光過度至白化, 部份水位亦沒修! 客人當然理論啦, 店主反駁說天氣潮濕關係並拒绝修補. 在言語間店主更call多兩位同事到場, 在威逼下客人只好無奈收貨. 經此事端後客人轉投本人. 此等風氣實在敗壞模型業的聲譽!! 要不得!!

香港模型業有下滑跡象, 在惡性競爭下大家為了保住飯碗, 收費不斷向下調, 最終導致成品質素降低. 一是大公司開天殺價, 令中低層人士接觸不了模型的樂趣. 這是本人最不願意見到的局面. 本人一直有一概念, 便是想建立一香港模型製作聯盟. 找一些信譽好, 質素高的同業结成一同盟, 再以一distributor為中心, 合理地因應各商户的專長把訂單分配给不同商户. 這樣不但可隱建香港模型製作業的架構, 更能避免不必要的惡性鬥爭及搶客事件, 而且成品質素更有保證. 本人最近就此建議接觸了數商户, 可惜均無進展, 他們擔心生意给分了, 唉.. 只看到眼前的私利, 而不欲長遠地為此行業作打算…
試問如何可互惠互利? 如何可振興香港模型業了?